Isaiah 1

1Umbono omayelana loJuda leJerusalema owabonwa ngu-Isaya indodana ka-Amozi ezinsukwini zokubusa kuka-Uziya, loJothamu, lo-Ahazi loHezekhiya amakhosi akoJuda.

Isizwe Esihlamukayo

 2Zwanini mazulu! Lalelani mhlaba, Ngoba uJehova usekhulumile: “Ngondla abantwana ngabakhulisa, kodwa sebengihlamukele.

3Inkabi iyamazi umniniyo, lobabhemi uyasazi isibaya sikamnikazi wakhe, kodwa u-Israyeli kazi, abantu bami kabaqedisisi.”

4Awu sizwe esonayo, bantu abathwele amacala, inzalo yabenza okubi, bantwana abaxhwalileyo! Sebemlahlile uJehova; bamedelele oNgcwele ka-Israyeli bamfulathela.

5Kungani kumele litshaywe futhi? Kungani liqhubeka ngokuhlamuka? Ikhanda lakho lonke lilimele, yonke inhliziyo yakho ihlukuluziwe.

6Kusukela ngaphansi kwentende yonyawo lwakho kusiya esicholo sekhanda lakho akukho kuphelela, kodwa izilonda lemvivinya kuphela, kanye lamanxeba; akugeziswanga, akubotshwanga kumbe kwathanjiswa ngamafutha.

7Ilizwe lenu lichithekile, amadolobho enu atshiswa ngomlilo, umhlaba wenu uphundlwa ngabezizweni, phambi kwenu uqobo, uchitheka njengalapho udilizwa ngabezizweni.

8INdodakazi yaseZiyoni isele njengedumba esivinini, njengendlwana ensimini yamajodo, njengedolobho elihonqolozelweyo.

9Aluba uJehova uSomandla wayengasitshiyelanga abalutshwana abasindayo, sasizakuba njengeSodoma; sasizafana leGomora.

10Zwanini ilizwi likaJehova lina babusi baseSodoma, lalelani umthetho kaNkulunkulu wethu lina bantu baseGomora!

11“Ubunengi bemihlatshelo yenu – buyini kimi?” Kutsho uJehova. Ngileminikelo yokutshiswa edlula efunekayo, eyezinqama lamahwahwa ezifuyo ezinonisiweyo; igazi lezinkunzi, lelamawundlu lelezimbuzi kalingithokozisi.

12Lapho lisizavela phambi kwami, ngubani olicelileyo ukube ligida emagumeni ami na?

13Yekelani ukuletha iminikelo eyize. Impepha yenu iyisinengiso kimi. IziNyanga ezithwasayo, amaSabatha lemihlangano – angingeke ngibekezelele imibuthano yenu yobubi.

14Imikhosi yenu yokuthwasa kwezinyanga lamadili enu amisiweyo umphefumulo wami uyakuzonda. Sekube ngumthwalo kimi; sengikhathele ngokukuthwala.

15Lapho lichaya izandla zenu likhuleka, ngizalifihlela amehlo ami; loba selikhuleka imikhuleko eminengi, angiyikulalela. Izandla zenu zigcwele igazi;

16gezani libe ngabahlambulukileyo. susani izenzo zenu ezimbi phambi kobuso bami. Yekelani ukwenza okubi,

17fundani ukwenza okulungileyo. Funani ukwahlulela okuhle, khuthazani abacindezelweyo. Vikelani izintandane, lamulelani umfelokazi.

18“Wozani khathesi nje, sibonisane sikanye,” kutsho uJehova. “Lanxa izono zenu zibomvu gebhu, zizakuba mhlophe nke njengongqoqwane.

19Uma livuma njalo lilalela, lizakudla okuhle kwelizwe;

20kodwa uma linqaba, lihlamuka, lizadliwa yinkemba,” Ngoba umlomo kaJehova usukhulumile.

21Khangelani ukuthi idolobho elithembekileyo selibe yisifebe. Lake lagcwala ngokufaneleyo, ukulunga kwakuhlala kulo kodwa khathesi sekuhlala ababulali.

22Isiliva senu sesingamanyele, iwayini lenu elihle selihlanganiswe lamanzi.

23Ababusi benu bangabahlamuki, abangane bamasela. Bonke bathanda izivalamlomo, bafune izipho. Izintandane kabazivikeli; indaba yomfelokazi kayifiki kibo.

24Ngakho-ke iNkosi, uJehova uSomandla, uMninimandla ka-Israyeli, uthi: “Ye, ngizabhodlisela ezitheni zami ngibuye ngiphindisele kwabayizitha zami.

25Ngizaphakamisela isandla sami kini; ngizawahlambulula ngokupheleleyo amanyele enu, ngisuse lakho konke ukungcola kwenu.

26Ngizabuyisa abehluleli benu njengezinsukwini zakudala labeluleki benu njengasekuqaleni. Muva uzabizwa ngokuthi iDolobho Lokulunga, iDolobho Elithembekileyo.”

27IZiyoni izahlengwa ngemfanelo, abaphendukayo bayo bahlengwe ngokulunga.

28Kodwa abahlamuki lezoni bazachithwa, lalabo abalahla uJehova bazabhubha.

29“Lizayangeka ngenxa yezihlahla zemi-okhi ezingcwele elazithokozisa ngazo. Lizakuba lehlazo ngenxa yamasimu elawakhethayo.

30Lizafana lom-okhi olamahlamvu asebuna lanjengensimu engelamanzi.

31Indoda elamandla izafana lencwathi umsebenzi wayo ufane lenhlansi; kokubili kuzakutsha kanyekanye, kungekho ozacitsha umlilo.”
Copyright information for NdeIBE